नानु कविता सृङ्खला...

नानु कविता

(१)फोटो

आफ्नै फोटो

नियालेर हेरिन्

त्यहाँ

सपना र सङ्घर्ष

पीडा र छट्पटी

बिषाद र शोक

तथा,घृणा र आक्रोशको

प्रतिबिम्ब देखिनन्

मात्र यत्ति भनिन्

फोटोमा सबै नआउनेरहेछ।

(२)रित्तो

रेलको प्रस्थानसँगै

सबै गए

अल्मलिएर

प्लेटफर्ममै रहेको

त्यो व्यक्ति

ओइलाएर म-यो

एक्लिएर होइन

सपना रित्तिएर।

(३)अतिथि

छेवैको छाप्रोभित्र

फरक केही छैन

सबै यथावत छ

सोधें-

खोई त लोकतन्त्र ?

लोकतन्त्र आएकोभए

प..र महलतिर बसेहोलान्

यहाँ त खानबस्नै कठिन छ।

(४)बिषयान्तर

अब बिषयान्तर गरौं

अलिकति जातको

अलिकति धर्मको

अलिकति भाषाको

अलिकति सम्प्रदायको

र अलिकति क्षेत्रको कुरा गरौं

कति गर्नु वर्गसङ्घर्षका कुरा

भो बन्द गरौं।

(५)अर्को बर्षा

निथ्रुक्कै भिजेको छ कपडा

कहाँ फेरूँ ?

विगत दिनमा

झमझम परेथ्यो

वर्गसङ्घर्षको झरी

हाम्रा प्रभुहरु

बर्षा आफ्नो कमाण्डमा नभएको ठहर गर्दै

कौसीमा उभिएर

पाइपबाट छरिरहेछन्

पानी जातपातको

हिजै भिजेकोचाहीं कहाँ राखुँ ?

लौ भन्नुहोस् कहाँ राखुँ ?

(६)सत्य-१

बहुमतको हल्ला

र भीडबाट जोगिन

सत्य किनारा लागेर बस्यो।

(७)सत्य-२

लुगा लाउ छोरी

सधैं ढाकिएर बस

सत्य नाङ्गो हुन्छ

र यो दुनिञा

सत्यको सामना गर्न

समर्थ भैसकेको छैन।

(८)पत्र

साविककै ठेगाना लेखिएको

नयाँ पत्र छ

छोरालाइ खाडी पठाउने

छोरीलाइ केटा खोज्ने

गाउँको खेत वेच्ने

र शहरमा घडेरी किन्ने योजना छ

जतनसँग राख

जीवनभरीको सपना छ।